Árangur atvinnustefnu ríkisstjórnarinnar endurspeglast í auglýsingum Vinnumálastofnunar ríkisins og EURES, evrópskri vinnumiðlun. Þar er verið að kynna fólki atvinnutækifæri í Evrópu og hvetja það til að koma sér úr landi.

Sérstaklega er höfðað til fólks úr heilbrigðisgeiranum, iðnaðarmanna, verk- og tæknifræðinga. Í þessum kynningum er sennilega að finna skilaboð Ögmundar Jónassonar og fleiri úr Vinstri grænum þegar þau tala um að við verðum að opna hugann og horfa til fleiri átta í atvinnusköpun. Þegar Ögmundur og hans fólk tala um að við Sjálfstæðismenn megum ekki festast í öngstræti og þröngsýni þegar við ræðum um eflingu atvinnugreina sem byggja á náttúruauðlindum okkar, eiga þau með öðrum orðum við það að best sé að koma atvinnulausum úr landi. Félagar hans s.s. Svandís Svavarsdóttir, Jón Bjarnason og fleiri leggja sín lóð á vogarskálarnar til að markmiðið náist sem best.

Það er auðvitað grátlegt til þess að vita að þetta fólk skuli hafa valist til forystu í íslensku samfélagi. En við þær erfiðu aðstæður sem hér sköpuðust varð tímabundið til jarðvegur sem illgresi líkt og Ögmundur og hans lið þrífast vel í.