Haft í hótunum > Jón Gunnarsson

28. janúar 2010 ..:: Skoðað 684 sinnum ::..

Nú eru skattahækkanir ríkisstjórnarinnar farnar að bíta almenning. Þegar hafa nauðsynjavörur hækkað og um mánaðarmótin munu landsmenn enn frekar finna fyrir aukinni skattpíningu. Viðbrögðin munu ekki láta á sér standa í minni neyslu og vaxandi óöryggi fyrirtækja og heimila. Það er í raun ótrúlegt að ríkisstjórnin skuli feta þessa braut á sama tíma og bent hefur verið á leiðir sem hefðu mildað allar hugmyndir um aukna skattbyrði á samfélagið samhliða því að halda uppi öflugra verkefnastigi hjá hinu opinbera. Þær leiðir hefðu styrkt skattstofna og hraðað viðreisn samfélagsins. Á áhugaverðri ráðstefnu Samtaka atvinnulífsins um hvert stefni í fjármálum ríkisins kom fram að skattheima ríkisstjórnarinnar væri kominn á ystu nöf. Fullyrt var að stjórnvöld hefðu gengið lengra í skattaheimtu sinni en gert hefði verið ráð fyrir í stöðugleikasáttmálanum. Að því leiti er stöðugleikasáttmálinn í uppnámi. Í nýlegri yfirlýsingu ASÍ segir m.a.: „Það eru mikil vonbrigði og í raun grafalvarlegt hvað ríkisstjórnin hefur sýnt lítinn áhuga á að nýta vilja aðila vinnumarkaðarins og lífeyrissjóðanna til samstarfs um að ýta verklegum framkvæmdum úr vör eins og rætt var um strax sl. sumar“. Það virðist sem þessari ríkisstjórn sé það kappsmál að koma atvinnulífinu í uppnám með aðgerðum sínum. Þar er ekki aðeins um að ræða þær skattahækkanir sem á hafa dunið heldur einnig neikvæð skilaboð gagnvart orkufrekum iðnaði að ógleymdum áformum sem munu kollvarpa íslenskum sjávarútvegi. Sársaukafull aðlögun að breyttum aðstæðum hefur þegar átt sér stað hjá einkafyrirtækjum, en ekki í rekstri hins opinbera. Samkvæmt upplýsingum frá Samtökum atvinnulífsins er áætlað er að störfum hjá einkafyrirtækjum hafi fækkað um 15.000 á undanförnum mánuðum. Á ráðstefnunni kom fram gagnrýni á lítið samráð við forstöðumenn ríkisstofnana um framtíðarsýn og að t.d. kynning á hinni undarlegu „20/20 sóknaráætlun“ ríkisstjórnarinnar hefði hlotið litla umræðu meðal forstöðumanna ríkisstofnanna. Bent var á að niðurskurður í rekstri stofnananna gerðist ekki eingöngu á skrifborðum ráðuneytanna, samráð við stofnanirnar væri nauðsynlegt til að ná raunhæfum árangri. Það er ljós að mikið verk er framundan hjá fjármálaráðherra við að koma skikki á rekstur ríkissjóðs. Skattahækkanir eru komnar fram af ystu nöf og mikill niðurskurður eftir. Á ráðstefnunni var áhersla lögð á að aðilar gengu í takt, það væri í raun eina leiðin til að ná árangri. Í því samhengi er fleyg hótun fjármálaráðherra, þegar hann sagði „you aint seen nothing yet“, þegar hann á nýlegri ráðstefnu um skattamál fjallaði um aukna skattbyrði almennings. Ekki er hægt að skilja ummæli ráðherrans á annan veg en þann að óttast megi frekari íþyngjandi aðgerðir af hans hálfu í skattlagningu. Héldu þó flestir að nóg væri að gert. Það er því miður ekki hægt að sjá að hann og ríkisstjórnin gangi í takt við aðra í þessu landi, fyrirtækin og heimilin. Þröngsýnir gamlir kommúnistar ráða för í fjármálaráðuneytinu með úrelt viðhorf í grundvallarmálum og hafa í hótunum við almenning og fyrirtæki. Ríkisstjórnin er forystulaus og áttavillt og veit ekkert hvert á að stefna. Hún virðist ráðalaus þegar kemur að þessum mikilvægasta málaflokki samfélagsins. Að óbreyttu er ástæða til að kvíða framtíðinni.

Athugasemdir

Nafn (skilyrt)

Netfang (skilyrt)

Vefsíða

Enter the code shown above in the box below

Láta mig vita með tölvupósti ef fleiri skrá hér athugasemdir.